Háskólinn í Reykjavík

Heilbrigðisverkfræði er nýleg grein verkfræðinnar.  Aðferðum verkfræðinnar er beitt á eða í mannslíkamanum til að leysa mismunandi vandamál tilkomin vegna veikinda eða slysa, eða einfaldlega til að bæta lífsgæði og öryggi okkar allra. Þannig er þekking á mannslíkamanum samþætt verkfræðilegum aðferðum í þverfaglegu námi. Oft er það svo, að heilbrigðisverkfræðingar vinna í teymum ólíkra sérfræðinga við þróun aðferða, búnaðar eða notkun þeirra á vettvangi fyrirtæka eða heilbrigðisþjónustunnar.

Undirstöðugreinar heilbrigðisverkfræðinnar eru stærðfræði, eðlisfræði og lífeðlisfræði, og einmitt lífeðlisfræðin og starfsemi mannslíkamans setur heilbrigðisverkfræðina í nokkra sérstöðu miðað við aðrar verkfræðigreinar.

Ögrandi, spennandi og fjölþætt eru viðfangsefni heilbrigðisverkfræðinga. Sem dæmi má nefna hönnun gervilima, ígræðanlegra hjartastuðgjafa, mæling ólíkra lífmerkja, þróun tækja til notkunar á skurðstofum, notkun raförvunar við endurhæfingu vöðva þverlamaðra einstaklinga, gerð tölvulíkana til að meta burðarþol beina o.m.m.fl. Þróun tækja og tækni byggir iðulega á nýjustu niðurstöðum rannsókna vísindanna úr ýmsum greinum heilbrigðis- og raunvísinda.  Einnig hafa heilbrigðisverkfræðingar verið eftirsóttir í stjórnun fyrirtækja og sjúkrahúsa.